المشكلة إن ... !

* كونك خسرت حاجة فـ ده العادي و المتوقّع ، لكن مشكلتك مابتبقاش ف الخسارة قد ما بـ تبقى في سؤال : " إزاي هـ تقدر تواجه العالم بعد الخسارة دي ؟! " ..

* مش المشكلة إنّك بـ تُقع .. مانتا كده كده هـ تُقع .. المهم ، إنت بـ تُقع إزاي ؟! .. و افتكر إن فيه ناس بعدما بـ تكون قامت م الوقعة خلاص ( مرض / دور اكتئاب / ... ) بـ ترجع أقوى م الأوّل ( زي اللعيب اللي بـ يرجع بعد الإصابة ) بس عشان تعوّض اللي فاتها بأثر رجعي .. 

* الناس عندها مفهوم معيّن يخص الصراحة و النتيجة إنهم بيقولوا أي حاجة و كل حاجة ف أي وقت ، فـ بدل ما يكحّلوها يـ عموها ! .. الصراحة ممكن تتحقق برضه بأسلوب ناعم عشان ماتجرحش بيها اللي قُدّامك خصوصاً لو كان قريّب منّك أوي .. 

* التسامح ده بـ يبقى ( أوبشن ) زيادة و مش موجود ف كل البشر ! .. و مش معنى إن فيه ناس مش قادرة تسامح إنهم كده بقوا شياطين ! .. أصلك مهما كنت قريب منهم و تعرفهم كويّس ، فـ إنت رغم كده ماتعرفش حجم ( الندوب ) اللي بقت جوّاهم ! 

* مفيش حاجة ف الدنيا دي مضمونة ! .. فـ لو عايز تضمن كل حاجة بحجّة إنك ماتبقاش ضيّعت وقتك أو عشان تحافظ على نفسك من الطوب و الدشدشة يبقى هـ تفضل واقف مكانك و عمرك ما هـ تجرّب حاجة .. ع الأقل جرّب كل اللي نفسك فيه و اللي تقترحه إنت على نفسك مش اللي يقترحوا عليك الناس .. إنك تضبّش أحسن ما تبقى واقف ع الشط !

* مشكلة الناس اللي بـ يبقوا قريّبين مننا و ( أكبر مننا ) إنهم دايماً شايفينّا من كوكب تاني خالص ، و شويّة مساكين مانعرفش حاجة لسّه عن الدنيا و وجعها ! .. عشان كده معظم كلامهم بـ يبقى فيه نصايح عشان نلحق نفسنا م الأوّل و مانغلطش نفس غلطتهم ! .. مع العلم إن ( النُضج ) ده ما بـ يجيش ما بين يوم و ليلة و لا بـ ييجي بالنصايح برضه ! .. و مفيش حد ف الدنيا دي بـ يبقى غاوي يكبر قبل أوانه !

* فيه علاقات ممكن الواحد يتسرّع و يسمّيها ( صداقة ) .. لكنها مابتبقاش كده ف الحقيقة ! .. ممكن تسمّيها تبادل خبرات ، تبادل أفكار ، تبادل أحاديث ( أهو من باب فشّ الغِلّ و السلام ) .. لكن وقت ما تبقى عايز حد يسندك يمكن ماتلاقيش حد خالص و يمكن مش هـ تلاقي غير واحد بس ( و ساعتها فعلاً هـ تبقى محظوظ ) ! .. أمّا الباقي فـ مش هـ يكون ليهم أي ردّ فعل ، أو إن ردود أفعالهم هـ تبقى ضعيفة جدّاً ( على غير المتوقّع يعني ) ! .. جايز عشان مش قادرين يشيلوا مسؤوليّة ( صداقة ) و اللي فيهم مكفّيهم ! .. و جايز عشان عمرهم ماعتبروك ( صديق ) من أساسُه !