* اوصل للّي إنت عايزه بالطريقة اللي اتبنّيتها .. الطريقة اللي تليق عليك و على ظروفك ، الطريقة اللي شَبَهك و على قدّك و قدّ إمكانيّاتك و إنت مقتنع بيها ، أولاً عشان ماتكونش بتكذب على حالك ، و ثانياً عشان لمّا توصل تبقى حاسس إنّك راضي عن نفسك ..
* فيه بشر ممكن يخافوا منّك ! .. يخافوا من إنّك تكون مش زيُّهم .. مش شبهّهُم ! .. النوعيّة دي بـ تتعرف لمّا كلّ كلامهم ليك يبقى مافيهوش جديد ! .. بيفنّطوا الظروف قُدّام عينيك بطريقة سلبيّة لحدّ ما يسدّوها ف وشّك ! .. و لمّا تبقى زي ما همّا عايزينك تكون ، ساعتها مفيش حدّ هـ يبقى أحسن من حدّ !
* " جرّب اللي بقولّك عليه مرّة ، يمكن توصل " ! .. الجُملة دي بس تتقال لـ بني آدم تايه ، مش عارف هو عايز إيه ؟! ، لكن لو واحد تاني محدّد كويّس اللي عايزُه و اللي رافضه ، و أنهي طريق اختاره عشان يمشي فيه ، يبقى مالهاش لازمة الجُملة دي معاه ..
* حصار الناس ليك عن طريق كلامهم و حُكمُهم عليك دايماً هو اللي بيدّيك إحساس إنّك لا راضي و لا مبسوط ، لكن ف الحقيقة لو خرجت برّه دايرتهُم هـ تكتشف إنّه كان بيتهيّألك حاجات كتير غلط ف حقّ نفسك ..
* في الغالب إنت مش وحيد ، إنت بس لسّه ماقابلتش اللي يشبهوك ف دماغك و أفكارك ..
* جرّب مرّة ف حياتك ماتحسبهاش و لا تفكّر ، جرّب مرّة تنطلق .. و افتكر إنّك لو خايف تغلط ، طب مانتا كده كده هـ تغلط ، لكن تغلط و إنت مبسوط و حُرّ أحسن أكيد ما تغلط و إنت متكتّف بجدول ( روتين ) إنت قيّدت بيه نفسك ..
* جسمك لما بـ يتعوّد على دوا معيّن مش هـ يتأثّر بيه بعد كده .. بـ معنى إنّك هـ ترجع تتعب تاني و عشان كده لازم تغيّر الدوا ! .. لو اتعوّدت على إيقاع واحد لحياتك مش هـ تحس إنّك مرتاح ، و يمكن مش هـ تحس بـ حياتك أصلاً ! .. مفيش مانع لو من وقت للتاني تعمل لـ نفسك Refresh ، التغيير أو ( الجِنان ) مطلوب برضه ! .. تخرّج جِنانك النهاردة عشان تعرف تكمّل ، أحسن ما تحبسُه جوّاك و مايبقاش ليك نفس تنجز حاجة أصلاً ..
هما لو يبطلوا ام نصايحهم الغالية بجد الواحد هيكون سعيد جدااااااا
ردحذفأنا ببقى مقدّرة ساعات يا وفاء إن فيه ناس بـ تنصحك عشان خايفة عليكي ، لكن ف نفس الوقت يا ريت النصيحة تبقى مرّة واحدة بس .. التجربة بـ تعلّم البني آدم أكتر من النصيحة و أكتر من إنه يستفيد من خبرات ناس تانية .. لإن دايماً فيه استثناءات ..
حذف