الجمعة، 7 يونيو، 2013

مسألة وقت !

* مش مهم الكلام ( الناس ممكن مايبقاش عندها القدرة إنها تنقّي كلامها كويّس ) .. المهم التصرّفات و الفعل و رد الفعل ! .. صحيح كده كده فيه بني آدمين كتير بـ يقعوا مننا ف السكّة و بـ نخسرهُم ( و ده طبيعي بالمناسبة ) لكن الفرق بـ يبقى في ( مين اللي بدأ ؟ ) ، فـ حاول ما تكونش إنت .. 

* حتى لو فكرك شارد ، حتى لو زعلان ، حتى لو مُكتئب .. دوس جامد و ادخل ف المهام اليوميّة .. مرّة ورا مرّة هـ تفوق ، مش مهم تفضل خايف أو زعلان ( فيه حاجات كل اللي بـ تبقى محتاجاه شويّة وقت مش أكتر عشان تأثيرها يروح ) .. المهم بس خوفك و زعلك ده مايوقّفكش .. 

* المواجهة حاجة لابد منها ، هي اللي بـ تختارك مش إنت اللي بـ تختارها .. عشان كده الهروب مابـ يجيبش نتيجة لإنّه حل مؤقّت .. 

* لمّا بـ تحصلّك مشكلة ما بـ تخافش منها ( لـ مجرّد إنها حصلت ) قد ما بـ تخاف من نفسك و من طريقتك ف مواجهتها ، يا إمّا لإنّك ماتعرفش الحل ، يا إمّا الحل المُتاح إنت مش قادر عليه ، يا إمّا الحل اللي تقدر عليه بـ يخسّرك كتير أوي .. ف كل الأحوال ماينفعش غير إنّك تقف على رجليك ( و يمكن تبقي زي التماثيل بالظبط ) .. وقفتك هـ تهوّن عليك أي حاجة لإنّها ممكن تخلّي كل حاجة بـ تعكنن عليك تهرب منّك لـ مجرّد إنها حست بـ قوّتك .. حتى لو كانت قوّتك دي شويّة تمثيل و مش حقيقيّة !

* ساعة لمّا تفتكر الحاجات اللي اتسببت ف أذيّتك و تلاقي نفسك مش زعلان و لا مضّايق اعرف إنك مسامح ، لكن طالما لسّه فيه ذرّة زعل ف قلبك يبقى إنت لسّه محتاج وقت ..

* معظم الناس ما بـ تبقاش عارفة م الآخر كده ( فن المواساة ) و إزاي تقدر تقف جنب حد و تهوّن عليه مشكلته دلوقتي مش بكره ! .. ملحوظة : ( إنت مش مُطالب إنّك لمّا تيجي تساعد حد تحلّ مشكلته بـ نفسك ، و ده لإن محدّش بـ يقدر يحلّ المشكلة غير صاحبها ) .. لمّا تيجي تواسي حد ما تفكّروش إن أسوأ من كده بـ يحصل ف الدنيا ( إنت كده هـ تزعّلُه أكتر ) لإن اللي واقع ف مشكلة ده ما بـ يبقاش عنده القدرة إنه يفكّر ف أي حاجة تانية غير نفسه .. لمّا تيجي تواسي حد ما تفكّروش برضه بـ مشكلته و الخسارة اللي بقى فيها عشان حالة الضعف اللي عايشاه ما تسيطرش عليه أكتر من كده .. لمّا تيجي تواسي حد حاول ما تحسّش بـ ضعفه أكتر من اللازم لإن ببساطة حالة التقمُّص دي هـ تخلّيك إنت كمان ضعيف و يمكن تعيّط جنبُه و هو بـ يبقى ماسك نفسه بالعافية أصلاً .. فكّره دايماً إنه أقوى من أي حاجة و إن حالة ( اللا حياة ) اللي هو فيها يمكن تطوّل لكنها مش هـ تستمر ، فكّره بأي موقف جدعنة منّه و إنّه زي ما قِدر يبقى جدع مع الناس هو كمان قادر يبقى جدع مع نفسه و يعرف يخرج م المحنة دي و يلاقيلها حل .. 

هناك تعليقان (2):

  1. عجبتني النصائح

    ساعات كتير باعدي في حالات اليأس او الحطام دي
    رفعتي معنوياتي حبتين :)

    @برقيكبيديا

    ردحذف
    الردود
    1. تقدر تقول عليها ( استنتاجات ) بلاش نصايح .. ^^

      و مبسوطة بجد إنها ريّحتك شويّة ، ابقى عدّي علينا كل فترة .. :))

      حذف