الخميس، 1 نوفمبر 2012

الوقوف ممنوع !


* قبل ما بتُدخل ف أي مشروع لازم تدرسُه كويّس الأوّل ، فما بالك بهدف إنت عايز تحقّقه ؟! .. يبقى من الأولى إنك قبل ما تبتديه تعملُّه " دراسة جدوى " و تشوف إنت ممكن تتعامل مع الإحباطات اللي هـ تقابلك إزاي ؟ ، سواء الإحباطات الموجودة فعلاً أو حتى اللي لسّه هـ تتوجد .. و ده مش معناه إنّك بتسوّدها ف وش نفسك من قبل ما تعمل أي حاجة أصلاً .. كُل ما هنالِك إن أي طريق بتمشي فيه بيبقى على قد الهدف و إذا كان الطريق طويل و للأسف مفيش غيره قُدّامك يبقى ع الأقل درّب نفسك إن " نَفَسك " يبقى طويل .. بدل ما تُقف ف نُصُّه !

* مش مطلوب منّك تبقى بني آدم ذكي أو عبقري أو سوبرمان .. مطلوب منّك بس تبقى مُجتهد و ده على اعتبار إن ربّنا مابيضيّعش تعب حد !

* أكتر سؤال عبقري ممكن الناس تسأله لبعض هو سؤال : " إنت ناوي تعمل إيه ؟ " مش " إنت نفسك تعمل إيه ؟ " .. السؤال الأوّلاني تحس إنه بيحمّسك أكتر من التاني بكتير .. أصل " ناوي " دي جايّة من " نيّة " و النيّة بتبقى لله .. و إنت لما بتنوي بإخلاص و من قلبك تعمل أي حاجة أو تحقق أي حاجة إنت عايزها لله كإنّك بتوعده .. " يا رب لمّا أوصل لـ كذا ، أو أوّل ما أحقّق الهدف الفُلاني مش هـ يبقى لنفسي قد ما هـ يبقى ليك إنت " .. ساعتها ربّنا هـ ييسّرها قُدامك و يوصّلك للي إنت عايزه كإنه بيقولّك .. " أنا نفّذت جُزء من الاتفاق و فاضل بس تنفّذ الجُزء بتاعك إنت و تحقّق وعدك " ..

* مش معنى إنّك تتبنّى هدف كبير ف حياتك إن حاجة زي دي ممكن تعكّنن عليك و تعيّشك طول عمرك تعبان .. إنت كده كده بتدفع التمن ، بتدفع تمن سكوتك ، بتدفع تمن كَسَلك ، و برضه بتدفع تمن هدفك .. لكن الأخيرة دي طعمها بيبقى أحلى من أي حاجة تانية ، أصلك مهما تعبت ، فـ إنت ف الآخر بتعرف تنام و عارف قيمة الحياة و قيمتك فيها .. 

* لازم تفشل عشان تنجح ، و لازم تنجح عشان تخاف أحسن النجاح ده يضيع ، و لازم تخاف عشان تفضل تشتغل و تحافظ ع اللي وصلتلُه .. الخوف ساعات بيحرّك !

* مهما كان اللي بتعملُه " و لا حاجة " ف نظر غيرك فـ ده مش سبب قوي يخلّيك تقف و تتخلّى عن هدفك .. إنت ممكن تزعل ، تُحبَط ، تسكُت ، تغضب ، تصرّخ .. لكنّك مش هـ تيأس لإنّك ملكش غير اللي بتعملُه و بس ، مالهوش بديل يعني و ده بقى أهميّة رقم ( 1 ) ف حياة كُل واحد ..

* طلّع نفسك برّه السَبق يمكن تعرف تفكّر كويّس و أدائك يتحسِّن و توصل أسرع .. ماتشتّتش دماغك و تفضل تقارن نفسك بـ 20 واحد تاني لإن كُل واحد عامل زي مايكون كوكب لوحده و عمرك ما هـ تلاقي كوكب زي التاني .. حاول تركّز مع نفسك إنت و بس ، و ماتحاولش تعيّش روحك ف سَبق مع 10 غيرك قد ما أحسن إنّك تعيش ماتش تحدّي ثُنائي بينك و بين نفسك .. 

هناك 8 تعليقات:

  1. كلام تمام
    بس المشكلة فى حتة المقارنة دى بس
    أنا عارف إنى مش حد تانى ولا اى حد أنا بس برضه لازم اقارن أعتقد ده عدم رضا منى
    بحاول أرضى أدعيلى

    ردحذف
    الردود
    1. شوف .. لو هتلاقي المقارنة دي جايبة معاك نتيجة و بتحمسك إنك تحسن من نفسك دايماً يبقى كده فل أوي ، لكن لو شايفها بتجيب معاك نتيجة عكسية يبقى إيه المانع لو تخرج نفسك منها و تجرب مفهوم تاني يبقى يقدر يزقك لقدام .. و ف كل الأحوال ربنا يوفقك و يفتحها ف وشك .. :))

      حذف
  2. أنا بحب اقرالك قوي

    ردحذف
  3. أنا اول مرة قريالك فيها كان بالصدفة بس بعد كدة بقيت بفتح المدونة كل شوية لدرجة انى اعجبت بيكى فتحت اليوتيوب عشان اشوفك ولقيتلك برنامج انتى مثلى الاعلى نفسي ابقى كاتبة زيك بس انا بحب الترجمة اكتر انتى اسلوبك رقيق قوي وكلماتك رائعة وفكرك تحفة انا بحبك قوي:))))

    ردحذف
    الردود
    1. هنـــــادي .. لسه واخدة بالي من تعليقك الأخير ..

      أنا شكلي هاخد التعليق ده أحطه ف برواز عندي عشان كل ما أكتئب أقراه اقوم أحس إن الدنيا لسه بخير .. مش بهزر بالمناسبة .. :)

      حبي اللي إنتي عايزاه ، و اتجدعني فيه و Do It من غير تفكير .. و هتوصلي يعني هتوصلي ..

      حذف
  4. من زمان ما بحبش المقارنات مع حد و بحب أركز لوحدي مع نفسي :)

    صدقتِ يا نهى

    عاش قلمك :)

    ردحذف
    الردود
    1. مش كده برضه يا سارة ؟ .. كده هوصل براحتي و زي مانا عايزة ف الآخر .. بدل ما دماغي تضرب لا قدر الله ولا حاجة .. :D

      حذف

ملحوظة: يمكن لأعضاء المدونة فقط إرسال تعليق.