مسألة وقت !

* مش مهم الكلام ( الناس ممكن مايبقاش عندها القدرة إنها تنقّي كلامها كويّس ) .. المهم التصرّفات و الفعل و رد الفعل ! .. صحيح كده كده فيه بني آدمين كتير بـ يقعوا مننا ف السكّة و بـ نخسرهُم ( و ده طبيعي بالمناسبة ) لكن الفرق بـ يبقى في ( مين اللي بدأ ؟ ) ، فـ حاول ما تكونش إنت .. 

المشكلة إن ... !

* كونك خسرت حاجة فـ ده العادي و المتوقّع ، لكن مشكلتك مابتبقاش ف الخسارة قد ما بـ تبقى في سؤال : " إزاي هـ تقدر تواجه العالم بعد الخسارة دي ؟! " ..

عنك و عن الناس ..

* " معرفة البَشَر " بـ تحتاج تعب و مجهود و بال طويل .. مش مسألة معلومات بـ يتم تجميعها عن بني آدم مُعيّن و السلام ! .. أو إنّك تقول لـ فُلان : " كلّمني عن نفسك " ! ، طيب كده تقدر تعرف عنّه إيه مثلاً ؟! .. اسمه ، سنّه ، عنوانه ، شُغله ، هواياته ، بـ يحب يسمع مين ؟ ، بـ يحب يتفرّج على إيه ؟ ، بـ يحب ياكُل إيه ؟ ، ... ! .. ربّنا خلق الدنيا في 6 إيام ، فـ إذا كنت مهتَم تعرف " فُلان " يبقى تستحمل و تدّي لـ نفسك معاه فرصة و اتنين و تلاتة ، و من مواقفه و أفعاله و ردود أفعاله ، ساعتها بس تقدر تقول إنّك بـ تعرفه .. و ساعتها برضه يا تقرّر تكمّل ف المعرفة دي أو لأ ..

كلاكيت أوّل و آخر مرّة !

* كُلّنا بيعدّي علينا مرحلة بنحس فيها إننا اتربّينا من أهالينا بما فيه الكفاية و إن ماعدش فيه جديد نقدر ناخدُه منهم ، و إن كُلّ واحد فينا قادر يتحمّل مسؤوليّة قرارُه ، و مش فاضل غير إنّه يواجه الدنيا " فَرَداني " .. يعني يواجهها بدماغُه ، و دي بقى المرحلة التانية من التربيّة ! .. لكن التربيّة هنا هـ تبقى مُختلفة من واحد للتاني ، مش هـ يبقى فيه قواعد عامة زي اللي اتعوّدنا نسمعها ف كُلّ البيوت ! ، و عشان كده ماينفعش " تسمع الكلام " و إنت مغمّض لإنّك مابقتش عيّل صُغيّر ! .. زي مانتا مش شَبَه حد " لا ف شكلُه ، و لا ف دماغُه ، و لا ف أفكارُه ، و لا ف ظروفُه .. " ، فـ مفيش برضه حد شَبَهك ..

الوقوف ممنوع !

* قبل ما بتُدخل ف أي مشروع لازم تدرسُه كويّس الأوّل ، فما بالك بهدف إنت عايز تحقّقه ؟! .. يبقى من الأولى إنك قبل ما تبتديه تعملُّه " دراسة جدوى " و تشوف إنت ممكن تتعامل مع الإحباطات اللي هـ تقابلك إزاي ؟ ، سواء الإحباطات الموجودة فعلاً أو حتى اللي لسّه هـ تتوجد .. و ده مش معناه إنّك بتسوّدها ف وش نفسك من قبل ما تعمل أي حاجة أصلاً .. كُل ما هنالِك إن أي طريق بتمشي فيه بيبقى على قد الهدف و إذا كان الطريق طويل و للأسف مفيش غيره قُدّامك يبقى ع الأقل درّب نفسك إن " نَفَسك " يبقى طويل .. بدل ما تُقف ف نُصُّه !

بالنيابة عن نفس بشريّة ..

* فيه حاجات جوّة البني آدم بتبقى منوّرة لوحدها و مابتنطفيش أبداً غير بموته ! .. لكن الكركبة ع التراب على عِشش العنكبوت هي اللي كاتمة النور ده ! .. غلطة الواحد بقى مش إنّه سمح للي حواليه إنهم يدوهاله - أصل كده كده كان لازم يستقبلها غصب عنّه خصوصاً لو بيحّدفوها عليه و نازلين تكسير في شبابيكه - .. غلطته إنه مابينضّفش أوّل بأوّل و النتيجة إنه زهق و قرف من نفسه ! .. و لا عارف يشتغل و لا عارف ينجز و لا عارف يكمِّل اللي بدأه و لا حتى عارف يحلم ! .. الموضوع زي ما يكون فيه عُمّال شغّالين ف بيتك .. هُمّا شغّالين لكن إنت مش عارف تشتغل و مستنّي اليوم اللي يخلّصوا فيه المهرجان بتاعهم ده عشان تنضّف كل حاجة من حواليك و ترجّعها أحسن م الأوّل .. ساعتها محدّش هـ يقدر يحدّف على بيتك حاجة تانية أو ع الأقل مش هـ يبقى زي الأوّل ..